Vill refsa fyrir hatursáróður

Margrét hélt erindi á fundi innanríkisráðuneytisins í morgun sem fjallaði um hatursáróður. Þar benti hún á að ákvæði í hegningarlögum sem bannar slíkan áróður gegn ákveðnum hópi fólks hafi ekki virkað sem skyldi. Í það minnsta væru dæmi um að ekki hafi verið brugðist við ýmsum ábendingum um að slíkur áróður væri viðhafður, meðal annars af því að viðkomandi hefði ekki hagsmuni af málinu.

„Hvað sem veldur þá jafnvel þarf að kveða skýrara á um að þetta ákvæði taki til almannahagsmuna, það þurfi ekki einungis að vera á grundvelli kæru frá einstaklingi sem telur á sér brotið,“ segir Margrét. Hún vill líka auka refsiheimildir í fjölmiðlalögunum. Nú má aðeins refsa fyrir að hvetja til refsiverðs athæfis - við því liggja stjórnvaldssektir á fjölmiðla. Margrét bendir á að lagt hafi verið fram lagafrumvarp á Alþingi þess efnis að hægt sé að refsa fyrir hatursáróður. „Og ég tel það mjög mikilvægt vegna þess að það eru hér fjölmiðlar sem ekki er hægt að ná til í dag eins og lögin eru, en yrði hægt að bregðast við ef þessi lagabreyting næði fram að ganga.“

Margrét vill líka setja sams konar lög yfir bloggsíður og samfélagsmiðla, þar sem fjölmiðlalögin ná aðeins til þeirra miðla sem miðli efni til almennings og lúti ritstjórn. Hún bendir á að almennt hafi hatursáróður á netinu aukist gríðarlega. „Þannig að það er ástæða til að bregðast við og þetta er litið mjög alvarlegum augum í löndunum í kringum okkur. Það er kannski málið að hér ætti líka að setja hatursáróður í forgang, eða viðbrögð við honum, eins og gert er í löndunum í kringum okkur.“

Fréttina má lesa á ruv.is hér; http://ruv.is/frett/vill-refsa-fyrir-hatursarodur