Starfsemi skrifstofunnar hefur til þessa fyrst og fremst byggst á öflun og miðlun upplýsinga. Meðal fastra verkefna hennar er að vinna skýrslur um stöðu mannréttindamála hér á landi fyrir alþjóðlegar nefndir bæði Evrópuráðsins svo og nefndir Sameinuðu þjóðanna, sem á grundvelli alþjóðlegra mannréttindasamninga taka fyrir og fjalla um skýrslur íslenskra stjórnvalda um efndir þeirra skyldna, sem þau hafa gengist undir með staðfestingu viðkomandi samninga - og framvindu mannréttinda á sviði þeirra hvers fyrir sig. Hafa verið skrifaðar hjá eða á vegum Mannréttindaskrifstofu Íslands svonefndar “skuggaskýrslur” um hinar opinberu skýrslur íslenskra stjórnvalda, en þær eru gagnrýnar athugasemdir við opinberu skýrslurnar. Nefndirnar hafa þessar athugasemdir til hliðsjónar þegar þær fara yfir framvindu mála í viðkomandi landi og gera þar um sínar athugasemdir.
Fulltrúar skrifstofunnar hafa nokkrum sinnum setið fundi eftirlitsnefnda Sameinuðu þjóðanna þegar skýrslur Íslands hafa verið teknar fyrir en þá eru kallaðir til fulltrúar stjórnvalda sem gera grein fyrir opinberu skýrslunum og ástandi þeirra mála sem þar er getið um. Þess er rétt og skylt að geta, að geysilegar framfarir hafa orðið á undanförnum árum í skýrslugerð íslenskra stjórnvalda um alþjóðasamningana. Verður ekki annað séð en að þau leitist við að vinna þær sem best.
MRSÍ hefur á stefnuskrá sinni að stuðla að rannsóknum á sviði mannréttinda. Hafa þegar nokkur slík verkefni verið unnin á vegum hennar eða í samvinnu við aðra aðila.