Vel heppnuð ljósaganga

Gengið var undir yfirskrift 16 daga átaksins þetta árið, sem er: Leggðu þitt af mörkum. Farðu fram á aðgerðir: Saman getum við bundið enda á ofbeldi gegn konum! Í farabroddi göngunnar voru kyndilberar sem láta sig málefnið varða, þar á meðal Jóhanna Sigurðardóttir, forsætisráðherra, Steingrímur J. Sigfússon, fjármálaráðherra, Þorgerður Katrín Gunnarsdóttir, varaformaður Sjálfstæðisflokksins, Stefán Eiríksson, lögreglustjóri höfuðborgarsvæðisins, Halldóra Geirharðsdóttir, leikkona, Jón Páll Eyjólfsson, leikskáld og Þórdís Elva Þorvaldsdóttir Bachmann, höfundur bókarinnar Ofbeldi á Íslandi á mannamáli.

Í lok göngunnar safnaðist göngufólk við Sólfarið og horfði í átt að Viðey, en að sérstakri beiðni gönguskipuleggjenda hafði verið slökkt á Friðarsúlu Yoko Ono frá byrjun göngunnar í þeim tilgangi að vekja á táknrænan hátt athygli á kynbundnu ofbeldi gegn konum. Eftir nokkurrar mínútna þögn var síðan tendrað á Friðarsúlunni, og þar með á táknrænan hátt varpað ljósi á vandann sem að okkur steðjar. Þegar búið var að lýsa upp með súlunni sungu Þrjár raddir og Beatur snilldarlega raddað lag um frið á jörð, göngufólki til mikillar ánægju.

Magnea Marinósdóttir, varaformaður UNIFEM, þakkaði hópnum fyrir þátttökuna og kvaddi með þeim orðum að við myndum hittast aftur í Ljósagöngu að ári en bætti svo við eftir smá hik að við myndum a.m.k. gera það ef kynbundið ofbeldi gegn konum yrði enn vandamál (!) Vakti það okkur til umhugsunar um þá miklu vinnu sem framundan er og einnig að allt er gerlegt þegar allir leggja hönd á plóg.

Ljósagangan tókst með eindæmum vel og áttu allir fallega stund saman. Veður var að mestu stillt og gott, sem kom sér vel þar sem göngufólk var með kyndla og stjörnuljós, en í allt tóku um 120 konur og menn þátt þetta kvöld.

Kynbundið ofbeldi gegn konum og stúlkum er útbreiddasta ofbeldi á heimsvísu og því er mikilvægt að allir leggist á eitt við að uppræta það.Við viljum þakka öllum þeim sem mættu fyrir stuðning þeirra við þetta mikilvæga málefni.