Ný aðgerðaáætlun til að eyða kynbundnum launamun á vinnumarkaði

Guðbjartur Hannesson velferðarráðherra skipaði framkvæmdanefnd í desember 2011 sem ætlað var að samhæfa aðgerðir til að draga úr launamisrétti kynja og vinna að gerð tímasettrar aðgerðaráætlunar. Velferðarráðherra kynnti aðgerðaráætlunina, sem samþykkt var 28. september síðastliðinn, á málþingi jafnréttisstofu í Hörpu í gær. Í kjölfarið skrifuðu aðilar stjórnvalda og samtaka aðila vinnumarkaðsins undir viljayfirlýsingu um stofnun aðgerðarhóps sem mun vinna að framkvæmd aðgerðaráætluninnar. Markmið aðgerðahópsins er að eyða kynbundnum launamun á innlendum vinnumarkaði. Aðgerðarhópurinn mun vinna í tilraunaskyni tvö ár með möguleika á framlengingu sé ákveðið að halda beri starfseminni áfram. Hver aðili viljayfirlýsingarinnar mun tilnefna einn fulltrúa í hópinn.

Aðilar sem skrifuðu undir viljayfirlýsinguna eru Guðbjartur Hannesson velferðarráðherra, Katrín Júlíusdóttir fjármála- og efnahagsráðherra, Gylfi Arnbjörnsson forseti Alþýðusambands Íslands, Stefán Aðalsteinsson framkvæmdastjóri Bandalags Háskólamanna, Elín Björg Jónsdóttir formaður Bandalags starfsmanna ríkis og bæja, Björg Bjarnadóttir varaformaður Kennarasambands Íslands, Vilhjálmur Egilsson framkvæmdastjóri Samtaka atvinnulífsins og Halldór Halldórsson formaður Sambands íslenskra sveitarfélaga. 

Aðgerðaráætlunina má lesa hér.