Ljósaganga

Dagurinn markar upphaf 16 daga átaks gegn kynbundu ofbeldi undir yfirskriftinni: Leggðu þitt af mörkum – Farðu fram á aðgerðir: Saman getum við bundið enda á ofbeldi gegn konum!

Í tilefni dagsins standa mannréttindasamtök og kvennahreyfingin á Íslandi fyrir LJÓSAGÖNGUtil að vekja athygli á ofbeldi gegn konum og hvetja til aðgerða. Lagt verður af stað frá Þjóðmenningarhúsi kl. 19:00 og gengið niður að Sólfarinu þar sem Friðarsúlan verður tendruð kl. 19:45.

Í fararbroddi verða kyndilberar sem láta sig málefnið varða, m.a. Jóhanna Sigurðardóttir, forsætisráðherra, Steingrímur J. Sigfússon, fjármálaráðherra, Þorgerður Katrín Gunnarsdóttir, varaformaður Sjálfstæðisflokksins, Stefán Eiríksson, lögreglustjóri höfuðborgarsvæðisins, Guðrún Jónsdóttir, talskona Stígamóta Halldóra Geirharðsdóttir, leikkona, Jón Páll Eyjólfsson, leikskáld, Margrét Tómasdóttir, skátahöfðingi Íslands, Ragnhildur Gísladóttir, tónskáld og Þórdís Elva Þorvaldsdóttir Bachmann, höfundur bókarinnar Ofbeldi á Íslandi á mannamáli.

 Yoko Onosendir Friðarkveðju í tilefni dagsins og Ljósagöngunnar. Kveðjuna er að finna í viðhengi en þetta er í fyrsta sinn sem ljós Friðarsúlunnar er tileinkað sérstöku málefni: Alþjóðadegi um afnám ofbeldis gegn konum.

 Friðarsúlan er ákall um frið -  ákall um heim án ofbeldis. Útbreiddasta ofbeldið á heimsvísu er kynbundið ofbeldi gegn konum og stúlkum. Kynfæralimlesting, kynferðisofbeldi, „heiðursmorð“ og ofbeldi á heimilum eru meðal þess sem milljónir kvenna um allan heim verða fyrir dag hvern. Enda þótt staða íslenskra kvenna sé sterk á mörgum sviðum þá er kynbundið ofbeldi alvarlegt vandamál hér á landi. Árið 2008 leituðu 547 einstaklingar til Stígamóta en frá upphafi samtakanna til ársloka 2008 hafa alls 5,279 manns leitað þar aðstoðar. 530 konur hafa leitað til Kvennaathvarfs á árinu 2009 komur til samtakanna eru frá upphafi um 5800.   

 Friður ríkir ekki í raun fyrr en búið er að uppræta ofbeldi gegn konum í öllum sínum birtingarmyndum.

 Þann 25. nóvember verður slökkt á Friðarsúlunni kl. 19:30 og síðan kveikt á henni aftur kl. 19:45 til að vekja á táknrænan hátt athygli á þeim myrku mannréttindabrotum sem felast í ofbeldi gegn konum - ofbeldi sem þrífst í skjóli kynjamisréttis, skammar og þagnar. Ljós friðarsúlunnar táknar von um frið og minnir okkur á hvað við getum lagt af mörkum hvert og eitt til að uppræta kynbundið ofbeldi.