Árleg ráðstefna og fundur Samtaka Evrópskra mannréttindastofnana (AHRI) haldin í Reykjavík 13. -14. september sl

13.-14. september sl. stóðu Mannréttindaskrifstofa Íslands ásamt Norsku mannréttindastofnuninni að skipulagningu árlegrar ráðstefnu AHRI sem var haldin í Reykjavík, nánar tiltekið í nýjum og glæsilegum salakynnum Háskóla Reykjavíkur.

Þema ráðstefnunnar var Reforming Human Rights Institutions: Progress and Status.

Samtökin voru stofnuð á Íslandi í september árið 2000 og því tilvalið að halda upp á 10 ára áfangann hér. Þess má geta að fyrsti formaður AHRI var þáverandi framkvæmdastjóri Mannréttindaskrifstofu Íslands, Bjarney Friðriksdóttir.

Á heimasíðu AHRI má finna frekari upplýsingar um samtökin.

Á ráðstefnunni fluttu margir mikilsmetnir sérfræðingar á sviði mannréttinda erindi um framþróun og endurbætur innan mannréttindastofnana, þar á meðal:

Nils A. Butenschøn, núverandi formaður AHRI og framkvæmdastjóri Norsku mannréttindastofnunarinnar.

Dr. Martin Scheinin, sérlegur sérfræðingur Sameinuðu þjóðanna um mannréttindi í baráttunni gegn hryðjuverkum.

Jan Helgesen frá Mannréttindaskrifstofu Noregs og í stjórn Feneyjanefndar Evrópuráðsins.

Jan Wouters, prófessor í alþjóðalögum og alþjóðastofnunum við Leuven Centre for Global Governance Studies / Institute for International Law, University of Leuven.

Philip Leach, prófessor í mannréttindum og framkvæmdastjóri Rannsóknastofnunar um Mannréttindi og Félagslegt réttlæti við London Metropolitan University.

Prof. Manfred Nowak, prófessor við Vínarháskóla og framkvæmdastjóriLudwig Boltzmann Institut für Menschenrechte.

Framkvæmdastjóri Mannréttindaskrifstofu Íslands stjórnaði málþingi annan daginn og fulltrúar fræðisamfélags Íslands voru Dr. Oddný Mjöll Arnardóttir, prófessor við lagadeild Háskólans í Reykjavík, Björg Thorarensen formaður Mannréttindastofnunar Háskóla Íslands og prófessor við lagadeild HÍ, og Rachael Lorna Johnstone, dósent við Háskólann á Akureyri.

Á síðu AHRI má sjá dagskrána (pdf) og á myndasíðu Mannréttindaskrifstofunnar má sjá nokkrar myndir sem teknar voru á ráðstefnunni, birtar með góðfúslegu leyfi Christians Boe Astrup hjá Norsku mannréttindastofnuninni.